دوای ئەوەی پێگەی"Webometrics" كە تایبەتە بە هەڵسەنگاندنی ئاستی زانكۆكان لە جیهاندا، تیایدا هەریەك لە زانكۆی (سلێمانی) و (سەڵاحەدین) لەسەر ئاستی هەرێمی كوردستان، پێگەی بەرزتریان تۆماركردوە، بۆ ئەم دەسكەوتەش، وەزیری خوێندنی باڵا و توێژینەوەی زانستی، لە پەیامێكدا دەستخۆشی لە ستافی زانكۆ و تەواوی مامۆستاو فەرمانبەر و خوێندكارانی هەردو زانكۆ كرد، كە ئەمە دەقەكەیەتی:

بەڕێزان سەرۆك زانكۆكانی (سلێمانی) و (سەڵاحەدین)

بەڕێزان ئەندامانی ئەنجومەنی زانكۆ

بەڕێزان مامۆستاو فەرمانبەرو خوێندكارانی خۆشەویست

جێگەی دەستخۆشی و دڵخۆشیمانە بەپێی ئەنجامی نوێترین زانیاری پێگەی" Webometrics"ی ئیسپانی كە تایبەتە بە هەڵسەنگاندنی ئاستی زانكۆكان لە جیهانداو بەپێی ئەو ڕیزبەندییە نوێیەی كە لەساڵی 2021 دا بڵاویكردوەتەوە، زانكۆی (سلێمانی) و زانكۆی (سەڵاحەدین) لەسەر ئاستی هەرێمی كوردستان، پێگەی بەرزتریان لەنەخشەی ڕیزبەندی زانكۆكانی جیهاندا دەستەبەركردەوەو لە پلەكانی پێشەوەدان، بەو بۆنەیەوە پر بەدڵ پیرۆزبایی لە ئێوەو سەرجەم مامۆستایان و فەرمانبەران و خوێندكاران و قوتابیانی ئازیزی زانكۆكانی سەڵاحەدین و سلێمانی دەكەم.

ئەم ئەنجامە ئەو ڕاستیە تەئكید دەكاتەوە كە سەرباری قەیران و كێشەو گرفتەكان، ستراتیژو روئیای وەزارەت و زانكۆكانمان بەر مەبنای نەخشە ڕێگەیەكی واقعی و زانستی ھەنگاو دەنێن، بۆ بەرزكردنەوەی تواناكانی وەزارەتی خوێندنی باڵا و توێژینەوەی زانستی و دامەزراوە ئەكادیمییەكانی بۆ سەر نەخشەی ئەكادیمیای ناوچەكەو جیھان.

لە كۆتایدا جارێكی تر پیرۆزبایی گەرم لە خۆمان و زانكۆی (سلێمانی) و (سەڵاحەدین) و كۆمەڵگەی ئەكادیمی كوردستان دەكەم.

هەمیشەو شادو سەركەتو بن...

د. ئارام محمد قادر

وەزیری خوێندنی باڵا و توێژینەوەی زانست

 ئەمەش لینکەکەی